LA MACANA
Galicia
Sleepwalkers
A guerra foi descrita como «un estado activo de confusión». Nun tempo de crecente conflito global, ‘Sleepwalkers’ sobrevoa a nosa relación ambivalente coa violencia como especie. Navega polo caos da mentalidade perturbada de Occidente, mentres desentraña a nosa capacidade tanto para a agresión como para a compaixón. O imaxinario caótico dos soños emerxe nunha néboa de guerra, mentres os intérpretes mesturan danza, teatro e música en vivo nun marco sombrío que nos desafía a tomar partido.
Nun formato particular, esta peza de longo formato coloca ao público no centro do escenario para unha experiencia radicalmente envolvente, froito da colaboración entre A Macana e Mute Comp. Physical Theatre.
LA MACANA
La Macana é unha compañía galega de danza, creada en 2009 por Caterina Varela e Alexis Fernández. Ela é bailarina, coreógrafa, produtora e directora de diversos proxectos de promoción das artes performativas e el é un recoñecido bailarín e coreógrafo de orixe cubana. Na súa traxectoria recibiron diferentes premios e os seus traballos gozan dunha boa acollida nos circuítos internacionais, presentándose en máis de trinta países e colaborando con diferentes artistas e teatros europeos. Os que coñecen A Macana esperan unha obra con forte material físico e unha estreita relación co público. A autobiografía é a principal fonte de inspiración.
